સાઉથ આફ્રિકાની કંપનીનું એક્વિઝિશન કરતાં સોલર ઇન્ડસ્ટ્રીઝનો શેર 14 ટકા ખાબક્યો

અમદાવાદઃ સોલર ઇન્ડસ્ટ્રીઝનો શેર મંગળવારે 14 ટકા ખાબક્યો હતો. કંપની સાઉથ આફ્રિકા સ્થિત ઓમ્નિયા હોલ્ડિંગ્સને 12,951 કરોડમાં ખરીદવાની હોઈ તેના શેરના ભાવમાં ઘટાડો થયો છે. જો કે આ એક્વિઝિશન નિયમનતંત્રની મંજૂરીને આધીન છે. આ ટ્રાન્ઝેકશન્સમાં ઓમ્નિયાના 100 ટકા શેર ખરીદવામાં આવનારા છે.

મંગળવારે બીએસઇ પર તેનો શેર આ એક્વિઝિશનના પગલે લગભગ 14 ટકા તૂટીને 19,273 થઈ ગયો હતો. આમ તેણે લગભગ ત્રણ હજાર રૂપિયાનો ઘટાડો નોંધાવ્યો હતો. સોલરનો શેર ડિફેન્સ ઇન્ડેક્સમાં 12 ટકા વેઇટેજ ધરાવતો હોવાથી તેમાં આવેલા કડાકાથી તેનો શેર પણ નીચે આવ્યો હતો.

કંપની આ એક્વિઝિશન માટે પ્રતિ શેર રૂ. 134.5 એટલે કે 1.35 ડોલરની ચૂકવણી કરશે. આ એક્વિઝિશન 2027ના મધ્યાંતર સુધીમાં પૂરું થાય તેમ માનવામાં આવે છે. આ સોદો પૂરો થયા પછી ઓમ્નિયા જોહાનિસબર્ગ શેરબજાર અને એટુએક્સ માર્કેટમાંથી ડીલિસ્ટ થશે. કંપની 23 દેશોમાં હાજરી ધરાવે છે અને 3,500થી વધુ લોકોને રોજગારી પૂરી પાડે છે.

સોલર ઇન્ડસ્ટ્રીઝનું કહેવું છે કે આ એક્વિઝિશનના લીધે કંપનીના ગ્લોબલ એક્સ્પ્લોઝિવ્સ અને માઇનિંગ સોલ્યુશન્સ પ્રોવાઇડર તરીકેનું સ્થાન વધુ મજબૂત થશે. તેના લીધે કંપની આફ્રિકા અને અન્ય આંતરરાષ્ટ્રીય બજારોમાં તેનું સ્થાન વધુ મજબૂત બનાવશે.

ગોલ્ડમેને સોલર ઇન્ડસ્ટ્રીઝ માટે રૂ. 26,550ના ટાર્ગેટ સાથે બાય રેટિંગ આપ્યું છે. આમ તેણે 25 ટકા ઉપર ભાવ આપ્યો છે. બ્રોકરેજે જણાવ્યું હતું કે આ એક્વિઝિશનના લીધે સોલર સાઉથ આફ્રિકામાં સૌથી મોટી કંપની બની જશે. તેના પગલે કોમર્સિયલ અને બ્લાસ્ટિંગ સોલ્યુશન્સમાં અગ્રણી કંપની બનશે. તેની સાથે કંપની બ્લાસ્ટિંગ સોલ્યુશન્સ અને કોમર્સિયલ એક્સ્પ્લોઝિવ્સ માટે વૈશ્વિક પ્લેટફોર્મ બનાવશે.  બ્લૂમબર્ગના ડેટા મુજબ સોલર ઇન્ડસ્ટ્રીઝ માટે 18માંથી 15 વિશ્લેષકોએ બાય રેટિંગ આપ્યું છે.