Commodity

તહેવારો પહેલાં ખાંડ સંકટ! શેરડીનું ઉત્પાદન ઘટતાં નિકાસ પર બ્રેક

ભારતમાં આગામી ખાંડ સિઝનમાં નિકાસની સંભાવનાઓ ઘટી શકે છે. ISMAના જણાવ્યા અનુસાર કર્ણાટક અને મહારાષ્ટ્રમાં દુષ્કાળ જેવી સ્થિતિના કારણે શેરડીના ઉત્પાદન પર અસર પડી શકે છે.સરકારે 10 લાખ ટન રૉ સુગર આયાતની મંજૂરી આપી છે, જેમાંથી 8 લાખ ટન માટે DGFTની મંજૂરી મળી ચૂકી છે.

desk@kuberanowPublished On : 29 Sept 2026

SUGAR — શેરડીનો પાક ઘટ્યો, ખાંડની ચિંતા વધીAI Generated Image

મુખ્ય મુદ્દાઓ

ISMAના મતે આગામી સિઝનમાં ભારત પાસે ખાંડની નિકાસ માટે વધારાનો જથ્થો રહેવાની શક્યતા ઓછી
કર્ણાટક અને મહારાષ્ટ્રમાં દુષ્કાળની સ્થિતિને કારણે શેરડીના પાકમાં ઘટાડાની આશંકા
સરકારે 10 લાખ ટન રૉ સુગર આયાતની મંજૂરી આપી, જેમાંથી 8 લાખ ટનને DGFTની મંજૂરી મળી
બ્રાઝિલથી આયાતી ખાંડના કેટલાક વેસલ ભારત પહોંચ્યા હોવાના અહેવાલ

ભારતમાં આગામી ખાંડ સિઝન માટે સ્થાનિક પુરવઠાને લઈને ચિંતા વધી રહી છે. શેરડીના ઉત્પાદન પર અસર થવાના અહેવાલો વચ્ચે ઇન્ડિયન શુગર એન્ડ બાયોએનર્જી મેન્યુફેક્ચર્સ એસોસિએશન (ISMA)નું કહેવું છે કે આગામી સિઝનમાં ભારત માટે ખાંડની નિકાસની સંભાવના ખૂબ ઓછી રહી શકે છે.

શેરડીના પાકમાં ઘટાડાની આશંકા

ISMAના ડાયરેક્ટર જનરલ દીપક બાલાણીએ જણાવ્યું કે સંસ્થા હાલમાં શેરડીના ઉત્પાદનનો સર્વે કરી રહી છે, જેનું વધુ સ્પષ્ટ ચિત્ર ઓક્ટોબરના ત્રીજા સપ્તાહમાં સામે આવશે. તેમણે જણાવ્યું કે હાલમાં ચોક્કસ અનુમાન લગાવવું મુશ્કેલ છે, પરંતુ કર્ણાટક અને મહારાષ્ટ્રમાં અલ નીનોની અસર અને દુષ્કાળ જેવી સ્થિતિના કારણે શેરડીના પાકને નુકસાન થયું હોવાના અહેવાલ છે. આ સ્થિતિને જોતા આગામી સિઝનમાં ભારત પાસે નિકાસ માટે વધારાની ખાંડ ઉપલબ્ધ રહેવાની શક્યતા ઓછી હોવાનું અનુમાન છે.

મહારાષ્ટ્ર અને કર્ણાટકમાં દુષ્કાળની અસર

કર્ણાટક સરકારે રાજ્યના લગભગ 100 જિલ્લાઓને દુષ્કાળગ્રસ્ત જાહેર કર્યા હતા. બીજી તરફ મહારાષ્ટ્ર સરકારે 265 તાલુકાઓને અછતગ્રસ્ત જાહેર કર્યા છે, જે રાજ્યના લગભગ 75 ટકા વિસ્તારને આવરી લે છે. ISMAના જણાવ્યા અનુસાર આવી સ્થિતિમાં વધારાના પુરવઠાની જગ્યાએ સ્થાનિક વપરાશ માટે પણ આયાતની જરૂરિયાત ઊભી થઈ શકે છે.

10 લાખ ટન રૉ સુગર આયાતને મંજૂરી

સ્થાનિક બજારમાં પુરવઠો જાળવવા સરકારે 10 લાખ ટન રૉ સુગરની આયાતની મંજૂરી આપી છે. આમાંથી 8 લાખ ટનની આયાતને ડિરેક્ટોરેટ જનરલ ઓફ ફોરેન ટ્રેડ (DGFT) દ્વારા મંજૂરી મળી ચૂકી છે. જો કે, વધુ આયાત કરવામાં આવશે કે નહીં તે વૈશ્વિક બજારના ભાવ અને આયાત પડતર પર આધારિત રહેશે.

બ્રાઝિલથી ખાંડના જહાજો પહોંચ્યા

સ્થાનિક બજારમાં ખાંડના ભાવ વૈશ્વિક ભાવોની સરખામણીએ નીચા આવ્યા હોવાથી મોંઘી આયાત કરવી મુશ્કેલ બની શકે છે. હાલમાં બ્રાઝિલથી આયાત કરવામાં આવેલી ખાંડના કેટલાક વેસલ ભારત પહોંચી ગયા હોવાના અહેવાલ છે. તહેવારોની સિઝનને ધ્યાનમાં રાખીને ઓક્ટોબર મહિના માટે સરકાર 23 થી 25 લાખ ટન ખાંડના ક્વોટા જાહેર કરે તેવી સંભાવના છે.