18 ઓક્ટોબરથી સાબરમતી-જમ્મુ તાવી ટ્રેન હવે કટરા સુધી દોડશે

વૈષ્ણોદેવીની યાત્રા કરતા ગુજરાતના મુસાફરો માટે પશ્ચિમ રેલવેએ મહત્વનો નિર્ણય લીધો છે. હાલ સાબરમતીથી જમ્મુ તાવી વચ્ચે દોડતી ટ્રેન નં. 19223ને 18 ઓક્ટોબર 2026થી શ્રી માતા વૈષ્ણોદેવી કટરા સુધી લંબાવવામાં આવશે. આથી મુસાફરોને જમ્મુથી કટરા જવા માટે અલગ ટ્રેન કે રોડ મુસાફરી કરવાની જરૂર નહીં રહે.

સાબરમતીથી દરરોજ 10:25 વાગ્યે ઉપડશે

ટ્રેન નં. 19223 સાબરમતી-શ્રી માતા વૈષ્ણોદેવી કટરા એક્સપ્રેસ 18 ઓક્ટોબરથી દરરોજ સવારે 10:25 વાગ્યે સાબરમતીથી ઉપડશે અને બીજા દિવસે સાંજે 6:55 વાગ્યે કટરા પહોંચશે. પાલનપુર સ્ટેશન પર ટ્રેનનું આગમન બપોરે 1:20 વાગ્યે અને પ્રસ્થાન 1:22 વાગ્યે રહેશે.

પરત ફરતી ટ્રેન 20 ઓક્ટોબરથી

ટ્રેન નં. 19224 શ્રી માતા વૈષ્ણોદેવી કટરા-સાબરમતી એક્સપ્રેસ 20 ઓક્ટોબરથી દરરોજ કટરાથી સવારે 4:50 વાગ્યે ઉપડશે અને બીજા દિવસે બપોરે 2:05 વાગ્યે સાબરમતી પહોંચશે. ટ્રેનને સાંબા, બારી બ્રાહ્મણ અને શહીદ કેપ્ટન તુષાર મહાજન સ્ટેશનો પર વધારાના સ્ટોપ પણ આપવામાં આવ્યા છે.

અન્ય બે ટ્રેનોના સમયમાં પણ ફેરફાર

ટ્રેન નં. 19415 સાબરમતી-શ્રી માતા વૈષ્ણોદેવી કટરા એક્સપ્રેસના સમયમાં 25 ઓક્ટોબરથી ફેરફાર થશે. નવા સમયપત્રક મુજબ આ ટ્રેન સવારે 6:15 વાગ્યે કટરા પહોંચશે. ટ્રેન નં. 12473 ગાંધીધામ-શ્રી માતા વૈષ્ણોદેવી કટરા સર્વોદય એક્સપ્રેસનું સમયપત્રક પણ 24 ઓક્ટોબરથી બદલાશે.

બુકિંગ 21 ઓગસ્ટથી શરૂ

ટ્રેન નં. 19223 અને 12473 માટે બુકિંગ 21 ઓગસ્ટ 2026થી PRS કાઉન્ટર અને IRCTC મારફતે શરૂ થશે.