સુરતથી શરૂ થયું ‘ઉન્નતિ’ અભિયાન, મહિલાઓ માટે જેમ્સ-જ્વેલરીમાં નવી કારકિર્દી અને બિઝનેસ તકો

જેમ્સ એન્ડ જ્વેલરી ક્ષેત્રમાં કુશળ માનવબળ અને મહિલા ભાગીદારી વધારવાના બિઝનેસ એંગલ સાથે Gem & Jewellery Export Promotion Council એટલે કે GJEPCએ ‘ઉન્નતિ જેમ્સ એન્ડ જ્વેલરીમાં મહિલાઓનું સશક્તિકરણ’ અભિયાન શરૂ કર્યું છે. સુરતમાં શરૂ થયેલા આ રાષ્ટ્રીય અભિયાનનો હેતુ મહિલાઓને કૌશલ્ય તાલીમ, કારકિર્દી, ઉદ્યોગસાહસિકતા અને નેતૃત્વની તકો સાથે જોડવાનો છે. GJEPC આ પહેલને માત્ર સામાજિક અભિયાન તરીકે નહીં, પરંતુ ઉદ્યોગના લાંબા ગાળાના વિકાસ અને સ્પર્ધાત્મકતા માટેના રોકાણ તરીકે જોઈ રહ્યું છે.

200 મહિલાઓને તાલીમ સાથે જોડવાનો લક્ષ્યાંક

અભિયાનના પ્રથમ તબક્કામાં ઓછામાં ઓછી 200 મહિલાઓની વિવિધ કોર્સ માટે નોંધણી કરવાનો લક્ષ્યાંક રાખવામાં આવ્યો છે. આ તાલીમ દ્વારા મહિલાઓને જેમ્સ એન્ડ જ્વેલરી ક્ષેત્રમાં નોકરી, વ્યવસાય અને ઉદ્યોગસાહસિકતાની તકો માટે તૈયાર કરવાનો પ્રયાસ કરવામાં આવશે. સુરતમાં યોજાયેલા કાર્યક્રમમાં 1,100થી વધુ મહિલાઓએ ભાગ લીધો હતો, જેમાં ગૃહિણીઓ, વિદ્યાર્થીનીઓ અને વિવિધ ક્ષેત્રમાં કારકિર્દી બનાવવા ઇચ્છતી મહિલાઓ સામેલ હતી.

$100 અબજ નિકાસના લક્ષ્ય સાથે જોડાયું અભિયાન

GJEPCએ 2040 સુધી જેમ્સ એન્ડ જ્વેલરી નિકાસ $100 અબજ સુધી લઈ જવાનું લક્ષ્ય રાખ્યું છે. કાઉન્સિલના જણાવ્યા મુજબ, આ લક્ષ્ય સુધી પહોંચવા માટે મહિલાઓની કુશળતા અને નેતૃત્વનો વધુ ઉપયોગ જરૂરી રહેશે. અભિયાનનો ફોકસ માત્ર ઉત્પાદન સ્તર સુધી મર્યાદિત નહીં રહે, પરંતુ ડિઝાઇન, ટેક્નોલોજી, મેનેજમેન્ટ, બિઝનેસ અને ઉદ્યોગસાહસિકતા સુધી મહિલાઓની ભાગીદારી વધારવાનો છે.

1,000 મહિલા રત્નકલાકારોને વીમાકવચ

GJEPCએ રત્નકલાકારોના પરિચય કાર્ડ હેઠળ મહિલા રત્નકલાકારો માટે વિશેષ પહેલ પણ જાહેર કરી છે. પ્રથમ તબક્કામાં 1,000 મહિલા રત્નકલાકારોને પરિચય કાર્ડ સાથે ₹1 લાખ સુધીનું મેડિકલ વીમાકવચ આપવામાં આવશે. આ કવર દ્વારા તેઓ મોટી હોસ્પિટલોમાં સારવારની સુવિધાનો લાભ લઈ શકશે.

આ પણ વાંચો: ક્રૂડ 100 ડોલર નીચે જતાં અને બેન્ક શેરોના ટેકાથી બજારે 73,000ની સપાટી ફરીથી હાંસલ કરી

10,000 મહિલાઓ સુધી પહોંચવાની વાત

ગુજરાતના ઉપમુખ્યમંત્રી હર્ષ સંઘવીએ કાર્યક્રમમાં કહ્યું કે આ અભિયાનને માત્ર સુરત સુધી મર્યાદિત ન રાખીને ગુજરાતના ગ્રામ્ય અને આદિવાસી વિસ્તારો સુધી લઈ જવું જોઈએ. તેમણે આગામી એક વર્ષમાં 10,000 મહિલાઓ સુધી પહોંચવાનો લક્ષ્ય રાખવાની વાત પણ કરી. રાજ્યસભાના સાંસદ ગોવિંદ ધોળકિયાએ મહિલાઓને માત્ર ઉદ્યોગમાં જોડાવા નહીં, પરંતુ વ્યવસાય શરૂ કરવા, રોજગાર ઊભો કરવા અને નેતૃત્વ લેવાની દિશામાં આગળ વધવા પ્રોત્સાહિત કરવાની જરૂરિયાત પર ભાર મૂક્યો.

સુરતથી દેશભરના ક્લસ્ટર સુધી વિસ્તરણની યોજના

GJEPCનો હેતુ સુરત ચેપ્ટરથી શરૂ થયેલા આ અભિયાનને દેશના અન્ય મોટા જેમ્સ એન્ડ જ્વેલરી ક્લસ્ટર સુધી પહોંચાડવાનો છે. કાઉન્સિલના જણાવ્યા મુજબ, મહિલાઓને યોગ્ય કૌશલ્ય, નેટવર્ક અને ઉદ્યોગ સાથે જોડાણ મળે તો તે ઉદ્યોગની ઉત્પાદન ક્ષમતા, નવીનતા અને નિકાસ વૃદ્ધિમાં મહત્વપૂર્ણ ફાળો આપી શકે છે.

આ પણ જુઓ

Watch onYouTube