28 સપ્ટેમ્બરે બેંક હડતાળ, ગ્રાહકોને રાહત આપવા સરકારનો ‘Backup Plan’

28 સપ્ટેમ્બરથી શરૂ થનારી ત્રણ દિવસની રાષ્ટ્રવ્યાપી બેંક હડતાળને પગલે સરકાર તૈયારીમાં લાગી છે. નાણાકીય સેવા વિભાગે જાહેર ક્ષેત્રની બેંકો, પ્રાદેશિક ગ્રામીણ બેંકો, ઇન્ડિયન બેંક્સ એસોસિએશન અને NABARDના મુખ્ય અધિકારીઓની બેઠક બોલાવી છે. હડતાળ દરમિયાન જરૂરી બેંકિંગ અને ગ્રાહક સેવાઓ ચાલુ રાખવા માટે વૈકલ્પિક વ્યવસ્થા અંગે બેઠકમાં ચર્ચા થશે.

અઠવાડિયામાં પાંચ દિવસ કામની મુખ્ય માંગ

સાત બેંક કર્મચારી અને અધિકારી સંગઠનોના સંયુક્ત મંચ યુનાઇટેડ ફોરમ ઓફ બેંક યુનિયન્સે વિવિધ પડતર માંગણીઓને લઈને હડતાળનું આહ્વાન કર્યું છે. તેમાં અઠવાડિયામાં પાંચ દિવસ બેંકિંગ કામકાજ કરવાની માંગ મુખ્ય છે. આ જ માંગને લઈને યુનિયનોએ 11 સપ્ટેમ્બરે પણ રાષ્ટ્રવ્યાપી હડતાળ કરી હતી. તે દરમિયાન બેંકોમાં કાઉન્ટર સેવા, રોકડ વ્યવહારો અને ચેક ક્લિયરન્સ જેવી સેવાઓને અસર થઈ હતી.

પેન્શન સંબંધિત માંગણીઓ પણ સામેલ

યુનિયનો દ્વારા પેન્શન અપડેટ કરવા, પેન્શનધારકો માટે સમાન મોંઘવારી ભથ્થું (DA) ફોર્મ્યુલા અને NPS હેઠળ આવતા કર્મચારીઓને જૂની પેન્શન યોજનામાં ફેરફારનો વિકલ્પ આપવા સહિતની માંગણીઓ કરવામાં આવી છે. યુનિયનોનો દાવો છે કે UFBUમાં બેંકિંગ ક્ષેત્રના આશરે 90 ટકા કર્મચારીઓનું પ્રતિનિધિત્વ થાય છે.

સપ્તાહાંતને કારણે પાંચ દિવસ સુધી અસરની શક્યતા

28, 29 અને 30 સપ્ટેમ્બરની ત્રણ દિવસની હડતાળ પહેલાં 26 અને 27 સપ્ટેમ્બરે સપ્તાહાંતની રજાઓ છે. તેથી બેંકિંગ સેવાઓ પર સતત પાંચ દિવસ સુધી અસર પડી શકે છે. 26 ઓગસ્ટે યુનિયનોએ હડતાળની નોટિસ આપી હતી. ત્યારબાદ યુનિયનો, ઇન્ડિયન બેંક્સ એસોસિએશન અને સરકારી પ્રતિનિધિઓ વચ્ચે સમાધાન પ્રક્રિયા પણ થઈ હતી, પરંતુ પાંચ દિવસના બેંકિંગ સપ્તાહની માંગ અંગે કોઈ ઉકેલ આવ્યો નથી.

આ પણ વાંચો : અમદાવાદમાં ટેક્સીની જેમ બુક થઈ રહ્યા છે ચાર્ટર પ્લેન, કોરોના બાદ માંગ વધી

આ પણ જુઓ :

Watch onYouTube