One Ticket, One Pass: ભારતના પ્રવાસન માટે સરકારની મોટી ડિજિટલ પહેલ

ભારતના પ્રવાસન ક્ષેત્રને વધુ ડિજિટલ, વિશ્વસનીય અને સરળ બનાવવા માટે કેન્દ્ર સરકારે મોટું પગલું ભર્યું છે. પર્યટન મંત્રાલય અને Open Network for Digital Commerce (ONDC)એ મળીને National Digital Tourism Stack (NDTS) લોન્ચ કર્યો છે. આ ઓપન ડિજિટલ ઈન્ફ્રાસ્ટ્રક્ચર પહેલનો ઉદ્દેશ ભારતના પ્રવાસન ઇકોસિસ્ટમને એક જ ડિજિટલ માળખા સાથે જોડવાનો છે, જેથી પ્રવાસીઓને સ્થળો, હોટેલ, હોમસ્ટે, ગાઇડ, ટ્રાન્સપોર્ટ અને અન્ય પ્રવાસન સેવાઓ સરળતાથી મળી શકે.

National Digital Tourism Stackને એક અલગ પ્રવાસન પોર્ટલ અથવા માર્કેટપ્લેસ તરીકે નહીં પરંતુ એક ઓપન ડિજિટલ ઈન્ફ્રાસ્ટ્રક્ચર તરીકે વિકસાવવામાં આવી રહ્યું છે. તેનો મુખ્ય ઉદ્દેશ દેશભરના પ્રવાસન વ્યવસાયોને અલગ અલગ ડિજિટલ પ્લેટફોર્મ સાથે જોડવાનો છે. આ નવા ડિજિટલ માળખા હેઠળ પ્રવાસન સેવા આપનારાઓને પોતાની માહિતી માત્ર એક વખત અપલોડ કરવાની રહેશે અને ત્યારબાદ તેઓ અનેક ડિજિટલ પ્લેટફોર્મ પર ગ્રાહકો માટે ઉપલબ્ધ બની શકશે. આ મોડલને “List once, reach multiple platforms” તરીકે રજૂ કરવામાં આવ્યું છે.

NDTSમાં 23,000થી વધુ પ્રવાસન અનુભવો અને હોમસ્ટેને જોડવાનો લક્ષ્યાંક રાખવામાં આવ્યો છે. હાલમાં ONDC નેટવર્ક પર 1,000થી વધુ પ્રવાસન સેવાઓ ઉપલબ્ધ છે, જેમાં 170 ASI સ્મારકો અને 29 મ્યુઝિયમનો પણ સમાવેશ થાય છે. આ પહેલનો ઉદ્દેશ પ્રવાસીઓ માટે પ્રવાસની સંપૂર્ણ પ્રક્રિયાને વધુ સરળ બનાવવાનો છે. હાલમાં ફ્લાઇટ, હોટેલ, કેબ, બોટ રાઇડ અથવા ધાર્મિક સ્થળોની સેવાઓ માટે અલગ અલગ વેબસાઇટ અથવા એપનો ઉપયોગ કરવો પડે છે. NDTS દ્વારા આ પ્રકારની સેવાઓને એક જ ડિજિટલ ઇકોસિસ્ટમ સાથે જોડવાનો પ્રયાસ કરવામાં આવશે.

કેન્દ્રીય પ્રવાસન મંત્રી ગજેન્દ્ર સિંહ શેખાવતે જણાવ્યું કે આ પહેલ માત્ર ટેક્નોલોજી સુધી મર્યાદિત નથી, પરંતુ તેનો ઉદ્દેશ પ્રવાસન વિકાસનો લાભ સ્થાનિક સમુદાયો, નાના ઉદ્યોગકારો, મહિલાઓ અને યુવાનો સુધી પહોંચાડવાનો છે. પ્રવાસન મંત્રાલયના અધિકારીએ જણાવ્યું કે આ Stackમાં AIને મુખ્ય ભૂમિકા આપવામાં આવશે. તેમનો ઉદ્દેશ “One Ticket, One Pass” જેવી વ્યવસ્થા ઉભી કરવાનો છે, જેથી પ્રવાસીઓની સમગ્ર યાત્રા એક જ ડિજિટલ અનુભવ દ્વારા સરળ બની શકે. તેમણે જણાવ્યું કે હાલમાં પ્રવાસીઓને પ્રવાસની અલગ અલગ જરૂરિયાતો માટે અલગ પ્લેટફોર્મનો ઉપયોગ કરવો પડે છે, જેના કારણે સમગ્ર પ્રક્રિયા જટિલ બની જાય છે. AI આધારિત ડિજિટલ ઈન્ફ્રાસ્ટ્રક્ચર આ સમસ્યાને ઘટાડવામાં મદદ કરશે.

National Digital Tourism Stackમાં AI આધારિત પ્રવાસ આયોજન, સેવા પ્રદાતાઓની વિશ્વસનીયતા, ડિજિટલ પેમેન્ટ, ઓળખ સંબંધિત જરૂરિયાતો અને ફરિયાદ નિવારણ જેવી બાબતો પર પણ ધ્યાન આપવામાં આવશે. એકંદરે, NDTS ભારતના પ્રવાસન ક્ષેત્રને વધુ સંગઠિત અને ડિજિટલ બનાવવાની દિશામાં મહત્વપૂર્ણ પગલું છે. આ પહેલથી નાના પ્રવાસન વ્યવસાયોને મોટા ડિજિટલ બજાર સુધી પહોંચવાની તક મળી શકે છે અને પ્રવાસીઓ માટે મુસાફરીનો અનુભવ વધુ સરળ બની શકે છે.

આ પણ વાંચો: ભારતીય પ્રવાસીઓની નવી પસંદ બન્યું ઓમાન; જાણો મુખ્ય 3 કારણો

આ પણ જુઓ:

Watch onYouTube